MIRANDÊS, A NOSSA SEGUNDA LÍNGUA OFICIAL
Ler la poesie de Felç ye un modo de ber l Praino de riba, cumo stando chubidos nun giodésico; cumo spreitando Fuonte Aldé, de la Trindade, por ua jinela antre sobreiros, anqueixelhada puls sous galhos. Fui nun de ls sítios mais guapos i de mais lomiada que lo conhecimos, a el i muitos outros Blogueiros de l Praino, ne l que fui l sigundo Ancontro de Blogueiros, an 2009. Fui ne l Cabeço de la Trindade, nun die caliente d´Agosto i adonde, cun la calor de las amisades que eilhi nacírun, inda mais l rechino calciu, só atamado cun las selombras de ls sobreiros que Felç habie yá cantado an soneto. Nistante, apuis d´almuorço, un rapaç algo ambergonhado, saca dun papel i lei l soneto, Cabeço de la Trindade. Alto cabeço de berde forrado/ Guarda de l Praino, fiel çantinela/ Bés-lo anteirico d´ua miradela/ I anté la Spanha que tenes al lhado. Fuste terreiro de guerras i amores/ Suspiros, gemidos, bózios, delores/…… I cántan cuntentos ls reissenhores.
Manuel Félix Galego Fernandes, naciu an Fuonte Aldé a 1960 nua houmilde família de lhabradores. Las purmeiras palabras que oubiu i falou, fui an mirandés. Daprendiu a falar i a screbir pertués, na scola de la sue aldé, adonde fizo la quarta classe.
An 1973 acabou l antigo 2º anho i an 1975 deixou de studar, sien acabar l antigo 4º anho de ls liceus. Mesmo deixando ls studos nunca perdiu l’hábito de leitura i ua beç por més lhebaba carradas de lhibros de l carro de la Gulbenkian, i nistante ls lie. Quando l carro deixou de passar, ampeçou a mercá-los i ler ye un gusto que le quedou siempre.
En 1993, casado i yá cun filhos, matriculou-se no Ansino Recorrente, tornou a ls studos i apuis acabou l Ansino Secundairo.
Ampeçou tamien a scribir poesie i partecipou nun concurso lhiterairo que la Cámara Municipal promobiu pa la comemoraçon de ls 450 anhos de eilebaçon de Miranda a cidade i adonde le fui dada ua mençon hunrosa, cun prémio an denheiro, que ambriou an lhibros de mirandés, publicados até anton.
Fui sócio fundador de la Associaçon Cultural de Fuonte Aldé (ACREFA) adonde eizerciu cargos an todos ls órganos sociales. Ajudou na ourganizaçon de REZOSA, festibal de cultura i música, que ampeçou an 1998, sendo subre la amportáncia de la música i de las modas cantadas para preserbaçon de la Lhéngua Mirandesa.
Ajudou a criar l PIÇARRON, un cuncurso de porba de binos, que se fai todos ls anhos an ampeço de Maio.
Scribe poesie tamien an pertués.
-
Edição: Julho de 2024 | ISBN: 978-989-9070-94-3 | Páginas: 60 | Encadernação: capa mole | Formato: 14cmx22cm