*Livro de memórias com desenhos de Rui Monteiro Alves integralmente escrito em mirandês
_
"Quando ampecei a screbir estas falas cun mie mai, nun me dei de cuonta que l camino s´iba anstreitando a cada die que passasse. Nesse tiempo, mesmo que nun le parecisse, inda era ua mulhier cun fuorça, eilha que era ua mulhier de fuorça. Inda fazie por ua huorta, un bon coubal cun la nuossa ajuda i d´Acácio i Tresa Capadora, por criaçon i por cochino. Apuis, fui soltando cousas al modo que ls delores mais se stribában i, passou a ser, na huorta, l miu capataç. Balie-se eilha sola na bida diária.
Estes registros fúrun ampeçados apuis que miu pai mos bolou de la mano. Naquel tiempo screbie ralas bezes, l mais de las bezes, quando you iba pa la Speciosa ou eilha iba para baixo."
Adelaide Monteiro
_
Adelaide Monteiro (Delaide Munteiro) naciu an 1949, na Speciosa, Miranda de l Douro. Formada an Cuntabelidade i Admenistraçon, ye porsora aposentada de l Ansino Secundairo. L mirandés fui la sue purmeira lhéngua i l dzeinho un de ls sous modos de spresson. Publicaçones andebiduales: an poesie, Antre Monas i Sbolácios, an mirandés, de la Zéfiro Edições, 2010. De la Poética Edições, bilhingue: Bózios, Retombos i Silêncios, 2015, Cun Gusto a Moras, bilhingue, 2021, Nun Riu de Lírios, 2022. An prosa bilhingue - Cumo Quien Pica Un Palo, De la Âncora Editora, 2022. Zulmira Morriu-se, traduçon de Zulmira Morreu, de Virgínia do Carmo i, traduçon de Poesie de António Salvado. Traduçon de bários testos i poemas de bários scritores. Partecipou an bárias obras coletibas, antre outras, Palabras de Liberdade (50 anos de Abril) 2024.
Bárias publicaçones na DiVersos i na Fuolha Mirandesa de l Jornal Nordeste, zde 2009. A la par, zde 1993, dedica-se a la pintura, habendo feito un manhuço de sposiçones andebiduales i coletibas.
__
Edição: Setembro de 2024 | ISBN: 978-989-9070-99-8 | Páginas: 384 | Encadernação: capa mole com badanas | Formato: 12cmx24cm